Është hapur sot në Tetovë, qendra ‘Fluturo për jetën’ në të cilën do të trajtohen fëmijët me autizëm. Kjo qendër u hap me përkrahje të komunës së Tetovës dhe me përkrahje të Presidentes së Fondacionit ‘Fëmijët Shqiptarë’, Liri Berisha.
‘Fluturo për jetën’ është qendra për fëmijë autistë që u përurua edhe në qytetin e Tetovës, pas punës dhe sukseseve disa vjeçare nëpër shumë qytete të Shqipërisë. Kjo qendër u hap me përkrahje të komunës së Tetovës dhe me përkrahje të Presidentes së Fondacionit ‘Fëmijët Shqiptarë’, Liri Berisha. Fëmijët e kësaj qendre do të kenë mundësi që të trajtohen në gjuhën amtare, deklaron Fatjona Geci nga ‘Fluturo për jetën’.
Kryetarja e komunës së Tetovës, Teuta Arifi deklaroi se edhe në vazhdim do të mbështesë aktivitete të tilla për fëmijët të cilët kanë nevojë me qëllim që të arrihet rezultati i duhur për ta.
Kjo qendër do të zbusë dhimbjen e shumë familjeve që jetojnë me fenomenin e autizmit, që ekziston dhe për të cilin flitet pak, theksoi Liri Berisha.
Statistikat botërore tregojnë se sëmundja e autizmit është tepër shqetësuese dhe rastet e saj janë në rritje. Shenjat e kësaj sëmundje shfaqen tek fëmijet pas moshës 1-2 vjeç. Çrregullimet e gjuhës dhe komunikimit janë ndër simptomat më karakteristike te fëmijët autikë, që evidentohen kur fëmija nis të flasë, ç’ka përbën një nga kriteret diagnostikuese.
E folura herë mungon, herë është e vonuar ose dhe atipike. Poashtu këto fëmijë nuk janë në gjendje të krijojnë asnjë lidhje emocionale me njerëzit e tjerë dhe nuk manifestojnë përgjigje ndaj aspekteve të ndryshme të ambientit. Ndërkohë që specialistët e shëndetësisë apelojnë për sensibilizimin e opinionit publik për përkrahje ndaj fëmijëve autistë dhe integrimin e tyre në shoqëri. /KlanMaqedoni
