Në kohën kur teknologjia e komunikimit është bërë shumë e rëndësishme për çdo veprimtari të organizuar shoqërore, edhe fjalorët elektronikë, qofshin ata një apo dygjuhësh, zënë vend të rëndësishëm në shkencën e leksikografisë.
Andaj, nisur nga ky fakt, versioni elektronik i Fjalorit Arabisht-Shqip, me autor Dr. Isa Memishi, do të jetë ndihmesë e madhe për gjithkënd që shpreh interesim për mësimin e gjuhës arabe, sidomos në këtë fillimshekulli, kur gati e gjithë literatura, qoftë ajo shkencore, letrare, publicistike është e digjitalizuar.
Deri më sot e vetmja mundësi për të zgjedhur ka qenë përzgjedhja e një fjalori klasik. Fjalorët seriozë dygjuhësh, zakonisht janë voluminozë dhe gjetja e fjalës së dëshiruar, karshi njohurive elementare të morfologjisë së gjuhës arabe, secilit përdorues i është dashur kohë e konsiderueshme për të arritur rezultatin e dëshiruar.
Në këtë moshë të teknologjisë kompjuterike, Fjalori elektronik Arabisht – Shqip, procesin e përdorimit të fjalorit do ta bëjë më të lehtë, më të shpejtë dhe më efektiv.
I vetmi resurs për të arritur te Fjalori elektronik Arabisht – Shqip, është që të keni qasje në internet. Qasja në fjalor arrihet duke klikuar në linkun https://arabisht-shqip.com/
Avantazhi i Fjalorit elektronik Arabisht – Shqip, është qasja e lehtë dhe e shpejtë si dhe përzgjedhja e fjalës së dëshiruar në trungun e foljes, e cila ju lejon të zgjidhni kuptimin më të përshtatshëm.
Fjalori elektronik Arabisht –Shqip tani nuk është një luks, është një domosdoshmëri në shoqërinë tonë, kur gjuha arabe është në mesin e gjashtë gjuhëve në Organizatën e Kombeve të Bashkuara dhe në të gjitha institucionet tjera ndërkombëtare, është gjuhë e komunikimit të katërqind milionë arabëve, në dymbëdhjetë shtete, të ashtuquajtura shtete arabe, në dy kontinente, në Kontinentin e Afrikës dhe në Kontinentin e Azisë.
Burimi: Kohajone
