Në organizim të Fondacionit “Litlle Bits of Good Foundation” u mbajt programi në kuadër të të cilit u ekspozuan vizatimet e nxënësve nga kursi Motivi, raporton Anadolu Agency (AA).
Në ekspozitën e titulluar “Edhe ne kemi ëndrra” u paraqitën 35 vizatime nga 21 nxënës të moshës prej 10 deri në 13 vjeç të cilët ishin pjesë e këtij kursi i cili vazhdon tashmë 6 vjet.
Kryetari i Komunës së Çairit, Visar Ganiu tha se ishte i impresionuar nga puna e nxënësve.
“Unë jam vërtet i impresionuar me veprat e bëra. Por, nga ana tjetër jam i motivuar me punën e kursit Motivi. Sigurisht, shumë ide të tjera do të dalin nga këtu, të cilat do të jenë si shtesë e programit arsimor të paraparë në shkolla”, theksoi ai.
Ganiu shtoi se ka disa tema aktuale në shoqëri. “Por, harrojmë se një vëmendje e veçantë duhet t’i kushtohet artit, matematikës, muzikës, etj.”, tha ai.
Ai iu referua mënyrës se si zhvillohet arsimi në vend si rezultat i pandemisë së COVID-19.
“Mungesa fizike (në shkolla) lë një vakum tek nxënësit në mënyrë që ata të mos absorbojnë 100 për qind të gjithë asaj njohurie. Prandaj mendoj se kjo shoqatë është në kohën e duhur, në vendin e duhur dhe me të vërtetë jep një kontribut të madh në këtë drejtim”, tha Ganiu, duke shprehur mbështetjen e komunës.
Pronari dhe iniciatori i kursit Motivi, Ismet Abazi tha se ai beson se ky qytet ka shumë engjëj mbrojtës, duke shtuar: “Kur rriteshim në fqinjësinë time, nuk e kishim gjithë këtë, por kishim shumë dashuri. Në Kanada dhe botën perëndimore flitet shumë për kujdesin. Por, këtu është kuptimi i vërtetë dhe jeta e njerëzve. Sepse njerëzit këtu ndajnë me të vërtetë”, tha ai.
Abazi thotë se beson se këta fëmijë mund të arrijnë shumë dhe nuk duhet të dorëzohen.
“Këto vende quhen qendra mësimore që do t’i ndihmojnë fëmijët të përfshihen në shkencë dhe ta duan shkencën”, shtoi Abazi.
“Këtyre fëmijëve u thonë se edhe ata mund të ëndërrojnë. Ndoshta ju jetoni në një lagje më të varfër, por nëse ndani dashurinë e prindërve tuaj, vëllezërve dhe motrave tuaja dhe nëse jeni të mirë me fqinjët tuaj, atëherë mund të bëni ëndrrat tuaja të bëhen realitet dhe një ditë mund të ndihmoni të tjerët”, tha ai.
Mësuesja e artit në kursin Motivi, Suhejla Ademi theksoi se ne gjithmonë duhet t’i mbështesim fëmijët për të arritur ëndrrat e tyre.
“Kursi Motivi është një vend ku fëmijëve u jepet një shans për të treguar talentin dhe ëndrrat e tyre. Nga jashtë, kjo ekspozitë mund të duket e vogël, por për ne mësueset e kursit, është një hap shumë i veçantë që do të rrisë më tej dashurinë dhe vullnetin tonë për të qenë në krah të fëmijëve dhe nxënësve, duke realizuar ëndrrat e tyre”, shtoi Ademi.
Artistja e re Daria Damevska – Idriz tha se arti i saj daton që prej katër vitesh kur nëna e saj bleu kanavacën e saj të parë.
“Ajo më tha merr dhe vizato çfarë të duash, çfarë të dëshiron shpirti yt. Dhe vizatova një vepër abstrakte që përfaqësonte një kështjellë. Që nga ajo ditë, dëshira ime për të vizatuar rritej gjithnjë e më shumë çdo ditë. Kur erdha në shkollën fillore kisha një profesoreshë e cila më shtynte çdo ditë që të avancoja më tej dhe të shkoja në gara. Marr pjesë në shumë gara, kam fituar shumë çmime. Ajo më shtynte përpara gjithnjë e më shumë. Deri në këtë ditë unë dëshiroj të vizatoj dhe të provoj shumë teknika, kështu që dua që çdo fëmijë i vogël që dëshiron të vizatojë të vazhdojë dhe të mos heqë dorë kurrë”, tha Idriz.
