Në Universitetin e Tetovës u promovua romani “Bijtë e Dheut” i autorit Llukas Dajns. Në këtë veprimtari morën pjesë Rektori i UT-së, Prof. Dr. Vullnet Ameti, dekanë fakultetesh, përfaqësues institucionesh, studentë dhe dashamirë të librit.
Mënyra e hartimit të këtij libri, linjat e tij narrative, ndërtimi i personazheve, situatave, dialogjeve e shumë cilësi të tjera e bëjnë romanin tipik dhe lehtë të komunikueshëm me lexuesit.
“Ajo që e bën veçanërisht intrigues romanin dhe që hap mundësi të ndryshme leximi si nga këndi i rrëfimit letrar ashtu edhe nga këndi i analizave historiko – politike, aluzionit të lëkundjeve të vogla të interesave të Fuqive të mëdha që si në efektin e fluturës shkaktojnë vërshime në shtetet e vogla të Ballkanit është pikërisht vendosja e ngjarjes në fillim të shekullit 20 –të në Maqedoni”, deklaroi Mr. Sc. Vjollca në cilësinë e recensueses. Romani në vete ngërthen peisazhe, pamje mbresëlënëse njerëzish e natyre, pamje të tmerrshme eksodi, kufomash, refugjatësh, arkitekturë, rrëfime historish personale, reflektime, shpresë, besim, paragjykime, mall, gënjeshtra, ëndrra, makthe, përndjekje e shumëçka. “Kur i llogarit të gjitha këto, përkthimi nuk mund të jetë vetëm punë teknike por kalon në përjetim dhe përvojë dhe krejt në fund, kënaqësi”, theksoi përkthyesja e romanit, Mr. Sc. Behare Kasami. Ata që shkruajnë nuk e kanë fort dhuntinë e fjalës dhe kjo është një ndër arsyet pse shkruajnë, prandaj zgjedhin të jetojnë në heshtje e hije.“Libri i Llukasit nuk ta jep atë luks, është libër me densitet të lartë ngjarjesh, subjektesh dhe vendesh”, u shpreh ish nxënësja e tij Donika Kamberi.
Nëpërmjet këtij romani, autori dëshiron që popujt e Ballkanit ta shikojnë njëri-tjetrin në sy dhe të vendosin balancë mes dritës dhe errësirës, të mirës dhe të keqes, sepse vetëm atëherë mund të bashkë ndjejnë njëri-tjetrin. Vetëm kështu mund të konceptohet ecja përpara. “Libri nuk është për një shqiptar. Nuk është as për Goce Dellçevin e as për Jane Sandanskin e VMRO-në, të cilët janë pjesë e librit, por jo personazhe kryesore. Personazhi kryesor është hija e jonë, ajo errësirë e thellë e zezë në shpirtin tonë që e kemi të gjithë, por rrallë e pranojmë”, nënvizoi autori i romanit “Bijtë e Dheut”, Llukas Dajns.
Libri “Bijtë e Dheut” u mirëprit nga pjesëmarrësit në promovim, të cilët treguan kureshtje për ta lexuar nga vetë fakti se ngërthen në vete një temë mjaft intriguese.
