Sot përderisa po flasim, në Ditën Botërore të Fëmijës, mijëra fëmijë në mbarë botën vdesin nga uria, mijëra janë pa çati mbi kokë, pa qasje në arsim, mijëra si refugjatë presin të gjejnë shpëtim dhe jetë më të mirë në vendet ndërkufitare, të ndonjë vendi, në kampe të improvizuara. Derisa këtë e flasim në udhëkryqet e kryeqytetit tonë, por edhe në qytetet e tjera, kemi fëmijë lypsarë, dhjetëra fëmijë jashtë sistemit të shkollës, kemi edhe fëmijë të cilët, në përgjithësi, nuk janë të evidentuar në librat amë të të lindurve. Duhet të përballemi me të gjitha këto probleme dhe të gjejmë zgjidhje konkrete shpejtë. U bëj apel institucioneve kompetente, të mos lejojmë asnjë fëmijë të jetë në rrugë, jashtë sistemit arsimor, i margjinalizuar ose i keqpërdorur.
Këtë e theksoi presidenti Stevo Pendarovski në fjalimin në shënimin e Ditës Botërore të Fëmijëve, në organizim të UNICEF në ngjarjen e titulluar “Thirrje e të rinjve për aksion për të ideuar një të ardhme më të mirë”, në të cilin bartësit e vendimeve dhe krijuesit e politikave patën mundësi t’i dëgjojnë të rinjtë dhe thirrjet e tyre për aksion për çështjet që janë të rëndësishme për gjeneratën e tyre – nga klima deri tek shëndeti mendor, arsimi, mundësitë e barabarta dhe cilësia më e mirë e jetës.
“Pandemia, për fat të keq, tregoi se sa të pambrojtur janë fëmijët dhe sesi realiteti i ri, i shëmtuar rrezikoi liritë e tyre, ëndrrat e tyre, fëmijërinë e shkujdesur. E gjithë kjo le të jetë një sfidë për të gjithë ne, një mundësi për një lloj rivendosjeje, vendosje prioritetesh dhe përfshirje thelbësore të të rinjve në proceset vendimmarrëse. Më lejoni t’u bëj thirrje edhe një herë të gjitha institucioneve kyçe që të punojnë në çështjet për fëmijët dhe të rinjtë dhe të punojnë së bashku për një të ardhme më të lumtur. Zëri i të rinjve duhet të dëgjohet dhe të përfshihet në vendimmarrje. Rimendimi i së ardhmes duhet të fillojë nga e tashmja sepse pa rimenduar të tashmen nuk mund ta rimendojmë as të ardhmen”, tha presidenti Pendarovski.
Në fushën e arsimit, ai theksoi se arsim cilësor është i pamundur pa investuar në të, pa planprograme moderne dhe përvetësim të aftësive praktike. Është e nevojshme që arsimi të prodhojë staf në përputhje me nevojat e tregut të punës.
Ngjarja e sotme, “Thirrja e të rinjve për veprim për të rimenduar një të ardhme më të mirë”, bazohet në iniciativën “Rimendoni të ardhmen” drejtuar nga UNICEF dhe presidenti Pendarovski, në të cilën të rinjtë anembanë vendit ndanë pikëpamjet dhe idetë e tyre për zgjidhje për sfidat më të mëdha që ata ndikojnë në jetën dhe të ardhmen e tyre.
