Kur u bë publik lajmi se fitues i sivjetëm i çmimit Nobël për letërsi është austriaku Peter Handke, një njeri i njohur si mbështetës i politikave fashiste të Sllobodan Millosheviqit kundrejt shqiptarëve, ky është njëherazi edhe lajmi më i keq për degradimin e institucionit më të lartë botëror për ndarjen e çmimeve prestigjioze Nobël, raporton TV21.
Kështu ka reaguar Instituti i Trashëgimisë shpirtërore dhe kulturore të shqiptarëve. Duke ndërmendur thënien e Pasternakut se “shkrimtari është edhe njeri i mirë”, është e papranueshme të shpallet shkrimtar i vitit dikush që mburret me Millosheviqin edhe sot, kur gjithë bota e qytetëruar e konsideron “fashist” agresionin e tij kundrejt shqiptarëve dhe boshnjakëve.
Për ta pasur të qartë se si e përjetojnë shqiptarët këtë vendim, mund të themi se ai është i njëjtë sikur një shkrimtar që e kishte mbështetur nazizmin e Hitlerit, pas Luftës së Dytë Botërore, të marrë çmimin Nobël për letërsi!
Instituti i Trashëgimisë Shpirtërore e Kulturore të Shqiptarëve – Shkup pret që drejtuesit e institucionit për ndarjen e çmimit Nobël për letërsi, ta rishqyrtojnë vendimin e tyre, dhe t’u kërkojnë falje shqiptarëve dhe boshnjakëve për këtë vendim skandaloz.
