Faqja e internetit e Ministrisë së Arsimit dhe Shkencës (MASH) nuk është ende në funksion pasi u sulmua nga hakerët më 9 shtator. Në 12 ditët e fundit është shkëputur plotësisht dhe nuk ka qasje në të.
Nga MASH thonë se po punohet për riaktivizimin e tij, por nuk specifikojnë se kur pritet një gjë e tillë.
Është raportuar se faqja (www.mon.gov.mk) është sulmuar nga ekipi grek i hakerëve “Netwatchers”. Më pas MASH njoftoi se është në komunikim me Qendrën Kombëtare për Incidentet Kompjuterike pranë Agjencisë së Komunikimeve Elektronike, ku është raportuar rasti dhe nga ku presin që me mbështetjen edhe të Ministrisë së Brendshme, të ndërmarrin veprime konkrete për zbardhjen e rastit.
Nga MASH njoftuan se nuk ka nevojë të shqetësohet për gjoja shkarkimin e bazave të të dhënave të qytetarëve, sepse në ueb-faqen, siç ishte paralajmëruar “nuk ka baza të tilla të të dhënave dhe ka karakter informativ”.
Ndërkohë, informacionet për aktivitetet e Ministrisë mund të ndiqen në profilin e saj në Facebook.
